កោះកុង៖ អយ្យការអមសាលាដំបូងខេត្តកោះកុង បានបង្គាប់ឱ្យសមត្ថកិច្ចនាំខ្លួនអ្នកបើកបរគ្រឿងអេស្កាវ៉ាទ័រកិនមនុស្សស្លាប់មកអយ្យការអមសាលាដំបូងខេត្តកោះកុង ឱ្យបានមុនថ្ងៃទី១៣ ខែមីនា ឆ្នាំ២០២៤ ដើម្បីសាកសួរអំពីដំណើររឿង។

ការបង្គាប់ឱ្យនាំខ្លួនជនសង្ស័យ ក្រោយពីតុលាការខេត្តកោះកុងបានទទួលសំណុំរឿងពីសមត្ថកិច្ចនាព្រឹកថ្ងៃទី២៩ ខែកុម្ភៈ ឆ្នាំ២០២៤។

ជាមួយគ្នានេះតំណាងអយ្យការក៏បានកោះហៅ ម្ចាស់គ្រឿងចក្រអេស្កាវ៉ាទ័រ តំណាងគ្រួសារជនរងគ្រោះ សាក្សី និងអ្នកពាក់ព័ន្ធផ្សេងទៀតមកបំភ្លឺ ដើម្បីចាត់ការស្របតាមនីតិវិធីច្បាប់ជាធរមាន។

ករណីគ្រឿងអេស្កាវ៉ាទ័រកិនមនុស្សស្លាប់ម្នាក់ បានកើតឡើងនៅថ្ងៃទី២១ ខែកុម្ភៈ ឆ្នាំ២០២៤ នៅចំណុចភ្នំត្រងោល ស្ថិតក្នុងភូមិ ជីមាល ឃុំអណ្តូងទឹក ស្រុកបូទុមសាគរ ខេត្តកោះកុង ដោយជនសង្ស័យ ឈ្មោះ តាំ ឈិន ភេទប្រុស អាយុ៣១ឆ្នាំ បានបើកថយក្រោយខ្វះការប្រុងប្រយ័ត្នបណ្តាលឱ្យកិនបុរសដែលជាម្ចាស់ចម្ការស្លាប់ ពោលមិនមែនជាករណីកើតឡើងដោយសារជម្លោះដីធ្លីនោះទេ៕